Туман солиқ инспекциясида “Тадбиркорлик субъект-ларида текширишларни чеклаш ва улар фаолиятига ноқонуний аралашганлик учун жавобгарликни кучайтириш бўйича меъёрлар” мавзуида анжуман бўлиб ўтди. Унда туман ҳудудида фаолият юритаётган тадбиркорлар, нодавлат ва нотижорат ташкилотлари вакиллари ҳамда шу соҳага алоқаси бўлган мутасаддилар иштирок этишди.

Тадбирни туман ДСИ бошлиғининг биринчи ўринбосари З.Зоҳидов очди ва мамлакатимизда тадбиркорлик субъектларига қулай шароитлар яратиш, уларни қўллаб-қувватлаш мақсадида солиқ маъмурчилиги самарадорлигини ошириш тенденциялари 2017 йилда ҳам сақлаб қолингани, хусусан,солиқ юкини камайтириш бўйича қатор ишлар қилинаётгани ҳақида гапирди. Шундан кейин сўз вилоят солиқ бошқармаси эксперти З.Раҳмоновга берилди.

– Солиқ маъмурчилигини такомиллаштириш ва солиқ солиш билан боғлиқ бошқа масалалар бўйича Солиқ кодексининг 38 та моддасига тегишли ўзгартиришлар киритилди, – деди ўз сўзида З.Раҳмонов. – Қонунчилигимизга киритилган ўзгартиришлар мамлакатимизда кичик бизнес ва хусусий тадбиркорликка кенг эркинлик бериш, уларнинг фаолиятига аралашувни тубдан қисқартириш, ҳуқуқбузарликларнинг барвақт олди олинишини таъминлаш, уларнинг профилактикаси самарадорлигини оширишнинг ҳуқуқий асосларини таъминлайди. Тадбиркорлик субъектларининг фаолиятини текширишнинг ва молия-хўжалик фаолиятини тафтиш қилишнинг белгиланган тартибини бузиш, худди шу-нингдек, тадбиркорлик субъектлари фаолиятини қонунга хилоф равишда текшириш ташаббуси билан чиқиш ва (ёки) ўтказиш, шундай ҳаракатлар учун маъмурий жазо қўлланилганидан кейин содир этилган бўлса, энг кам ойлик иш ҳақининг бир юз эллик бараваридан уч юз бараваригача миқдорда жарима ёки уч йилгача муайян ҳуқуқдан маҳрум қилиш ёхуд уч йилгача ахлоқ тузатиш ишлари билан жазоланади. Гапнинг тўғрисини айтсак, тадбиркорларга катта имтиёзлар берилди. Энди улар шунга мувофиқ иш юритишса, ҳеч бир тўсиқларсиз ишласа, мамлакатимиз янада тараққий этади.

Анжуман сўнгида тадбиркорлар ўзларини қизиқтирган саволлар билан мурожаат этишди ва аниқ жавоблар олишди.

Н.ОЛИМОВ

СУРАТДА тадбирдан бир кўриниш акс этган.

Сурат муаллифи Б.ҚОДИРОВ