тўкин дастурхон демакдир

Бошоқли дон экинларидан юқори ҳосил олиш ерларни ва навларни тўғри танлаш ҳамда жойлаштиришга боғлиқлиги деҳқончиликда сир эмас. Бунга амал қилган фермерларимиз кейинги йилларда суғориладиган майдонлардан ўртача ҳосилдорликни 40-50 центнерга етказдилар. Илғор фермерлар бу кўрсаткични 50-60 центрнердан оширишга эришмоқдалар.

Бу бошоқли дон экинларидан юқори ҳосил етиштиришда ҳали талайгина фойдаланилмаётган имкониятлар мавжудлигини кўрсатади. Қайд этиши керакки, ғаллани илмий асосланган технологиялар, илғор агротехник тадбирлар асосида парваришлаш муҳим аҳамият касб этади. Шунинг учун жорий йил 25-февраль куни Ўзбекистон Республикаси Президенти Ш.Мирзиёев раҳбарлигида қишлоқ хўжалиги масалаларига бағишланган видеоселекторда ҳам 2019 йил учун экилган бошоқли дон экинлари парваришини сифатли ташкил этиш, агротехник тадбирларни ўз вақтида кечиктирмасдан амалга ошириш борасида қатор топшириқлар берилди. Бош прокуратура ҳузуридаги Агросаноат мажмуи ва озиқ-овқат хавфсизлиги таъминланиши устидан назорат қилиш инспекцияси туман бўлими ходимлари ҳам амалга оширилаётган ишларни назорат қилиш билан бирга фермерларимизга амалий кўмак бериб бормоқдалар.
Яқинда ғаллачилик фермерлари иштирокида ўтказилган семинарда ҳам асосий эътибор бугунги долзарб юмушларга қаратилди.
Таъкидлаш жоизки, бугун тумандаги мавжуд 3340 гектар ғалла экинлари тўлиқ иккинчи марта азотли минерал ўғитлар билан озиқлантирилди. Дала бошига гектарига 5 тоннадан нури чиқарилиб, суғориш ишлари шарбат усулида олиб борилмоқда.
Шунингдек, бегона ўтлар, касаллик ва зараркунандаларга қарши ишлов бериш ҳамда қўшимча суспензия билан озиқлантириш чоралари ҳам кўриляпти.
Бу борада семинарда мутахассислар фермерларимизга керакли тавсия ва кўрсатмалар берди. Албатта агротехник тадбирларни тўғри ва ўз вақтида ташкил этилиши ҳосил миқдорини ошириб, хирмонни юксалишга омил бўлади. Юксак хирмон эса тўкин дастурхон демакдир.

А. Ғафоров,
Инспекция туман бўлими бошлиғининг ўринбосари