Самарқанд шаҳридаги Педагогика ва хизмат кўрсатиш коллежида 27-29 февраль кунлари ташкил этилган "Самарқанд вилоят ҳудудий саноат ярмаркаси ва кооперация биржаси" ўз ишини якунлади. Кўргазманинг асосий ҳомийси "AGROMIR BUILDINGS" масъулияти чекланган жамияти бўлди.

Кўргазмада Тошкент шаҳри ва Самарқанд, Бухоро, Тошкент, Қашқадарё вилоятларидан 144 тадбиркорлик субъекти ўзлари ишлаб чиқараётган импорт ўрнини босадиган, маҳаллийлаштирилган 1540 маҳсулот билан иштирок этишди.
Кўргазмада вилоятдаги хорижий ва қўшма корхоналар вакиллари, уларнинг чет эл иштирокчилари фаол бўлишди.
Барча иштирокчиларга кўргазма маҳсулотлари ва уларнинг нархлари бўйича чоп этилган тарқатма материаллар берилди, кўргазмадан кейин ҳам музокаралар ўтказиш ва шартномалар имзолаш учун асос яратилди.
Кўргазмадаги маҳсулотлар намуналари билан танишиш, маҳсулотлар хариди бўйича музокаралар ўтказиш ҳамда cooperation.uz электрон кооперация портали орқали шартномаларни расмийлаштириш мақсадида Самарқанд вилояти шаҳар ва туманларидан, бошқа вилоятлардан 800 дан ортиқ тадбиркорлик субъектлари, халқ таълими, мактабгача таълим, соғлиқни сақлаш, болалар спорти муассасалари, ветеринария хизмати вакиллари, якка тартибдаги тадбиркорлар иштирок этишди. Кўргазма фаолияти билан Халқ депуталари вилоят Кенгашининг саноат, коммуникация ва инфраструктура тизимлари бўйича доимий комиссияси аъзолари ҳам танишишди, тақдимотларни тинглашди.
Кўргазмада биринчи марта вилоят божхона бошқармасининг 2018-2019 йилларда энг кўп импорт қилинган ва ишлаб чиқариши мураккаб бўлмаган маҳсулотлар намуналари, уларнинг вилоятга ва республикага импорт қилинган миқдорлари ва нархлари ҳақида маълумотга эга тадбиркорларга маҳаллийлаштириш учун ўта муҳим бўлган пештахта ташкил этилди.
Кўргазмада намойиш этилган олий таълим муассасалари талабаларининг Start Up лойиҳалари ва уларнинг тақдимотлари кўргазма иштирокчиларида алоҳида қизиқиш уйғотди.
Кўргазма давомида ишлаб чиқарилган саноат маҳсулотларини сертификатлаш, саноат корхоналарида сифат назорати ISO 9001 ҳалқаро стандартини жорий этиш, cooperation.uz электрон кооперация порталида шартномаларни расмийлаштириш бўйича семинар машғулотлари интерактив тарзда намойиш этилди.
Худди шундай ишлаб чиқаришни маҳаллийлаштириш ва саноат корхоналари билан кооперация алоқалари орқали тадбиркорликни ривожлантириш имкониятлари интерактив ҳолда кўргазма иштирокчиларига тақдимот этилди.
Кўргазма тадбири якунида Самарқанд вилоят ҳокимининг ишлаб чиқаришни маҳаллийлаштириш ва саноатда кооперация алоқаларини кенгайтириш масалалари бўйича ёрдамчиси Н.А.Ибрагимов тадбирда эришилган натижалар сарҳисоби бўйича фикр билдиргандан сўнг Халқ депутатлари Самарқанд вилоят Кенгаши депутати, Кенгашнинг саноат, қурилиш, транспорт, алоқа, коммунал хўжалик ва аҳолига хизматлар кўрсатиш масалалари бўйича доимий комиссиясининг раиси Ў.Саидмуродов ва Ўзбекистон Республикаси савдо-саноат палатаси вилоят бошқармаси бошлиғи Ш.Юлдошевлар билан биргаликда номинациялар ғолибларига тегишли дипломларни топширишди.
Қувонарлиси шундаки, "Саноатда кооперация алоқаларини кенгайтириш борасида энг фаол корхона - 2019" номинациясида 1-даражали диплом туманимиздаги "STEKLOPLASTIK" МЧЖга, "Маҳсулот ишлаб чиқаришни маҳаллийлаштириш борасида энг фаол корхона - 2019" номинацияси бўйича эса худди шундай диплом "INTER KRISTAL SAVDO SERVIS" корхонасига топширилди.
Шунингдек, "Самарқанд вилоят ҳудудий Саноат ярмаркаси ва кооперация биржаси - 2020 даги энг фаол корхона", "Самарқанд вилоят ҳудудий Саноат ярмаркаси ва кооперация биржаси - 2020 даги энг фаол ҳудуд", "Самарқанд вилоят ҳудудий Саноат ярмаркаси ва кооперация биржаси - 2020 даги энг жозибадор савдо белгиси (бренди)", "Саноат корхоналари орасида сифатни бошқариш ISO 9001 халқаро стандарти жорий этган энг илғор корхона - 2019" номинациялари бўйича ҳам ғолиблар аниқланди.
Тадбирда 2019 йил маҳаллийлаштириш лойиҳаларини амалга оширишда фаол иштирок этган бир қатор раҳбар ходимлар, мутахассислар вилоят ҳокимининг Фахрий ёрлиқлари билан тақдирландилар.

Баҳриддин ХОНКЕЛДИЕВ