Ўтган ҳафта пайшанба куни ЎзМТДП туман Кенгашининг XII Мажлиси бўлиб ўтди. Мазкур Кенгаш раиси Ш.Маҳмудов Ўзбекистон "Миллий тикланиш" демократик партияси туман ташкилотининг жорий йил биринчи ярим йилликдаги фаолияти якунлари ҳамда иккинчи ярим йилликдаги вазифалари хусусида сўзлади.

ЎзМТДПдан сайланган депутатлик гуруҳи раҳбари Н.Каримов депутатлик гуруҳининг шу даврдаги фаолияти ҳақида тўхталиб, декабрь ойида бўлиб ўтадиган Олий Мажлис Қонунчилик палатаси ҳамда маҳаллий Кенгашлар депутатлиги сайловига тайёргарлик кўриш бўйича партия фаолиятини ривожлантириш, тарғибот-ташвиқот ишларини янада кучайтириш лозимлигини таъкидлади.
Тадбирда қатнашган вилоят партия ташкилоти девонхонаси раҳбари А.Солиев тумандаги партиядошлар, депутатлар корпуси, туман ва бошланғич партия ташкилотлари етакчиларини сайловолди сиёсий, ташкилий жараёнларда фаолроқ бўлиш, энг муносиб, энг курашчан номзодларни танлаш ва тайёрлашга чақирди. Билдирилган танқидий фикрлар, таклиф-мулоҳазалар инобатга олинган ҳолда мажлис қарори қабул қилинди.

Ўз мухбиримиз