Мамлакатимиз аҳолисини эртаги сабзавот маҳсулотларига бўлган талабини тўлиқ қондириш мақсадида, ҳосилдан бўшаган майдонларга совуққа чидамли экинлардан - сабзи, пиёз, ош лавлаги, кўкатлардан - кашнич, петрушка, сельдерей, салат кабиларни тўқсонбости муддатида экиб, етиштириш муҳим аҳамиятга эга.

Уруғ экилган эгатлар устидан чириган маҳаллий ўғитлар, дарахт қипиқлари билан мульчалаш ёки шаффоф полиэтилен плёнкаларини ёпиш сабзавот уруғларини эрта кўкламда барвақт униб чиқиб, жадал ўсиб-ривожланишини таъминлайди. Шунда эрта баҳорда экишга қараганда ҳосил етилиши 30-40 кунгача эрта, ҳосилдорлиги эса 15-20 фоиз кўп бўлади.
- Маълумки, тўқсонбости усулида экиш тадбири Республикамизнинг марказий қисмида жойлашган вилоятларда ноябрь ойининг иккинчи ўн кунлигидан декабрь ойининг биринчи ўн кунлиги охирларигача, жанубий вилоятларда эса 20-декабргача амалга оширилиши тавсия этилади. Шунга мувофиқ туманимизнинг барча хўжалик тоифаларида, аҳоли хонадонларида ҳам кузги шудгорлаш ва тўқсонбости экинлар экиш ишлари жадаллик билан олиб борилмоқда, дейди- туман ҳокимининг ўринбосари Фирдавс Рахимов
Жумладан, 2020 йил ҳосили учун август-сентябрь ойларида пиёз ва саримсоқпиёз ҳамда тўқсонбости усулида жами экилиши режалаштирилган майдон 1306 гектар, шундан фермер хўжаликларида 555 гектар, аҳоли хонадонларида 751 гектарни ташкил этади. Бугунги кунгача фермер хўжаликларида 249 гектар, аҳоли хонадонларида 194,6 гектар майдонларга тўқсонбости экинлар экилган. Кузги шудгорлаш режаси эса 1549 гектар бўлиб, бугунга қадар 906 гектар ер шудгор қилиниб, режа қариб 60 фоизга бажарилди.
Қайд этиш лозимки, тўқсонбости усулида экишда сепилган сабзавот уруғлари қиш мавсумида униб чиқмайди, аксинча, аксинча қишки ёғингарчиликлар туфайли тупроқдаги намликка тўйинади ва ҳаво ҳарорати 4-5 градус бўлганда яъни, кўкламда бегона ўт уруғларидан олдин ердаги намдан кўкариб чиқади.

Фотима МАҲМУДОВА