Давлатимиз раҳбарининг жорий йил 20 февралдаги "Обод қишлоқ" дастурини 2019 йилда амалга ошириш бўйича қўшимча чора-тадбирлар тўғрисида"ги қарори ижросини таъминлаш мақсадида дастур доирасида туманда яна учта: Паррандачилик, Гулобод ва Пулмуғоб маҳаллалари танлаб олиниб, мазкур маҳаллалар қиёфасини янада кўркамлаштириш, аҳоли учун муносиб турмуш шароитларини яратиш борасида қилинадиган ишлар юзасидан чора - тадбирлар белгиланди.

Бунинг учун 30 млрд. 652 млн. сўм маблағ сарфланиши назарда тутилган. Дастурни амалга ошириш жараёнида умумий узунлиги 23,8 километрдан иборат минтақавий (ички) йўллар таъмирланиб реконструкция қилинади. 3 та маҳалладаги умумий узунлиги 4 километр бўлган кўчаларда 110 та тунги ёритгичлар ўрнатилиб, 6 та автобекатлар қурилади.
Бундан ташқари, ичимлик сув таъминотини яхшилаш мақсадида 9 км. янги тармоқ ҳамда битта сув иншооти барпо этилади. Дастурга мувофиқ, 1072 та уй-жой, 1 та мактабгача таълим муассасаси ва 1 та қишлоқ врачлик пункти таъмирланади, 2 та мактаб реконструкция қилинади. Шунингдек, бозор инфратузилмасини яхшилаш учун 18 та савдо дўконлари қурилиши ҳам режалаштирилган.
Амалга ошириладиган бундай бунёдкорлик ишлари туманимиз аҳлининг фаровон турмуш кечириши, аҳоли саломатлиги, баркамол авлод таълим-тарбиясини янада ривожлантириш каби хайрли мақсадларга хизмат қилади.

Ш. ЖУМАЕВ,
туман ҳокимининг ўринбосари