Автобус бекатида икки қизнинг экранларда намойиш этилаётган сериаллар ҳақидаги суҳбати қулоғимга чалинди. Гап-сўзларидан сериал томоша қилишда ашаддий "ишқибоз" эканликлари сезилиб турган бу қизларни олдин ҳам бир неча маротаба худди шу жойда учратганлигим, ҳатто бирга суҳбатлашганлигимиз учун уларнинг олийгоҳларнинг бирида таҳсил олишларидан хабардор эдим. Шу боис, одоб доирасидан четга чиқмаган ҳолда суҳбатларига қўшилдим.

– Очиғини айтсам сессиялар бошланиб, дарсларингиз кўпайган бир пайтда сериал томоша қилишга вақт топаётганларингизни кўриб ҳайрон қолдим. Сиз талабалар учун вақт энг қимматли, шу билан бирга ҳамиша етмайдиган, камлик қиладиган эҳтиёжларнинг бири эканлигини билганим учун ҳам қизиқиб сўраяпман.
– Тўғрику-я, лекин дарс тайёрлаш, эрталабгача китоб ўқиш бизларга ўхшаган кўпчилик талабалар учун аллақачон сийқаси чиқган гап, ортиқча бош оғриғи, холос.-дея гап бошлади улардан бири - Пулини берсангиз, олам гулистон! Чунки ўқисак ҳам, ўқимасак ҳам "нафс" барибир ғолиб чиқаверади. Ўзлаштиришимиз керак бўлган билимлар китобларда қолиб кетаётган бўлса ҳам, чўнтагимиздаги пул мушкулимизни осон қилиб турганлигини деярли ҳар бир талаба асл ҳақиқат деб ҳисоблайди. "Нафс ноғораси"га ўйнаб керакли баҳони сотиб олиш, рейтинг дафтарчасини тўлдириш назаримда энг осон ечим. Ахир, шунда сих ҳам, куймайди кабоб ҳам...
Талаба қизнинг ишонч ва қатъият билан "нафс ноғораси" ҳақидаги очиқдан-очиқ айтган гапларини эштиб эҳтимол, ўз лоқайдлиги, масъулиятсизлигини шу баҳона орқали хаспўшлаётган бўлса, ажаб эмас, деб ўйлаб қолдим. Бироқ, олийгоҳларда таҳсил олаётган талабалар сафида худди шу талаба қизга ўхшаб мулоҳаза юритаётган, шундай йўл тутаётганлар йўқ, деб инкор этиш қийин. Қизиқ, билимдан кўра нафс ғолиблигини тан олишни афзал кўриб ўқишдан мақсади ўқимишли бўлиш эмас балки, "диплом"гагина эга бўлиш бўлган бундай талабалардан келажакда қандай мутахассис, кадрлар етишиб чиқиши мумкин?

Фотима МАҲМУДОВА