Ўзбекистонда кўзи ожизлар ташкилотининг тузилганига 85 йил, унинг нашри бўлган "Бир сафда" журналининг чоп этилаётганига 60 йил тўлиши муносабати билан жойларда учрашувлар, маърифий-бадиий кечалар ўтказилмоқда. Яқинда Хожа Аҳрори Вали маҳалласидаги "Марҳабо" базмгоҳида туман ҳокимлиги ҳомийлигида байрам тадбири бўлиб ўтди.

Унда вилоят ва тумандан 50 нафарга яқин кўзи ожиз таклиф этилди. Самарқанд вилоят кўзи ожизлар жамиятлари бошқаруви раиси С.Пўлатов йиғилганларни фашизм устидан қозонилган Буюк Ғалабанинг 72 йиллиги билан қутлади ва юртимизда кўзи ожизлар ташкилоти тузилганидан шу пайтга қадар амалга оширилган ишлар ҳақида гапирар экан, унинг органи ҳисобланган "Бир сафда" журнали саҳифаларида булар ўз ифодасини топгани, топаётгани ҳақида сўз юритди.
Тадбирда сўз олган туман кўзи ожизлар жамияти раиси А.Нормуродов туман ҳокимлигининг бевосита ёрдами билан ногиронларга кўсатилаётган меҳр-мурувват туфайли уларнинг шароитлари яхшиланиб бораётганини таъкидлади. Ҳар байрамда кўзи ожиз, қалби ўксик инсонлар ана шундай безатилган дастурхонга таклиф этиладилар, совға-саломлар топширилади. Ургут ва Пастдарғом туманлари КОЖ раислари З.Азимов, А.Урунқуловлар ҳам сўзга чиқиб шундай тўкин дастурхонни, хусусан, байрам тадбирини ташкил этган туман ҳокимлиги, ҳомий ташкилотларга миннатдорчилик билдиришди.
Шундан кейин туман маданият ишлари бўлимининг иқтидорли санъаткорлари ижросида дилрабо куй ва қўшиқлар янгради. Барча Олимжон Пўлатов, Насрилло Одилов ижросида янграган "Шашмақом" тароналари-ю, қўшиқларини берилиб тинглашди.
–Хотиржамлик - буюк неъмат,–дейди Қўзибой Донабоев. –Тинчлик ҳукм сурган юртдагина инсон қадрланади, қадриятлар эса улуғланади. Мустақиллик йилларида диёримизда инсон манфаатлари энг олий қадрият даражасига кўтарилиб, бой ҳаётий тажрибага эга инсонлар эъзозланаяпти. Мана бугунги эъзоздан ҳам биз, кўзи ожизлар бағоят хурсанд бўлдик.
Бўлиб ўтган тадбир қатнашчиларда унутилмас таассуротлар қолдирди.

Нормуҳаммад ОЛИМОВ
СУРАТДА: тадбирдан кўриниш акс этган.
Сурат муаллифи А.МУРОДОВ