Яқинда Самарқанд "Темурбеклар" мактабида Ўзбекистон Республикаси Вазирлар маҳкамасининг 2018 йил 23 февралдаги 140-сонли қарори билан тасдиқланган "Ёшларни ҳарбий ватанпарварлик руҳида тарбиялаш концепцияси"га асосан Ўзбекистон мудофаасига кўмаклашувчи "Ватанпарвар" ташкилоти ташаббуси билан "Биз ватанпарварлармиз!" шиори остида маънавий-маърифий, спорт ва маданий тадбирлар бўлиб ўтди.

Марказий ҳарбий округ қўмондонлиги, Ўзбекистон Республикаси миллий гвардияси, вилоят фавқулодда вазиятлар бошқармаси, вилоят мудофаа ишлари бошқармаси, Ўзбекистон ёшлар иттифоқи вилоят кенгаши, вилоят маданият ишлари бошқармаси ва "Ўзбекконцерт" эстрада бирлашмаси ҳамкорлигида ташкил этилган тадбирга "Темурбеклар мактаби", СамДУ қошидаги академик лицейи ва Самарқанд автомобилсозлик коллежининг махсус ҳарбий гуруҳлари, хизмат бурчини бажариш чоғида жонбозлик кўрсатган ҳарбий хизматчи оила аъзолари, фахрийлар, "Ватанпарвар" ташкилотининг Осиё ва жаҳон чемпионларидан жами бўлиб 600 нафардан ортиқ ўқувчилари қамраб олинди.
"Биз ватанпарварлармиз" шиори остидаги тадбирлар доирасида "Ёшларнинг ҳарбий ватанпарварлик тарбияси (амалий ва назарий асослари)" номли қўлланма тақдимоти, "Ватанпарвар" ташкилоти ўқитувчиларининг "Йўл қоидаси – умр фойдаси" ва "Отам, онам ва мен – биз спортчилар оиласимиз" мавзусидаги маҳорат дарслари, ҳарбий жанговор техникалар, "Ватанпарвар" ташкилотининг спорт-техникалари, фавқулодда вазиятларда қутқарув техникалари кўргазмалари, фахрий қоровулдан иборат ҳарбийларнинг карабинли чиқишлари, Ўзбекистон Республикаси миллий гвардияси 82139 ҳарбий қисм чиқишлари намойиш этилди.
Шундан сўнг, "Темурбеклар мактаби", СамДУ қошидаги академик лицей ва Самарқанд автомобилсозлик коллежининг махсус ҳарбий гуруҳлари "Тош кўтариш", "Арқон тортиш" ва "Арм-ресслинг" спорт турлари бўйича ўзаро беллашишди. Муросасиз ўтган беллашувларда "Темурбеклар мактаби" ўқувчилари кучли эканликларини яна бир бор намоён қилишди. Мусобақа ғолиблари "Ватанпарвар" ташкилотининг диплом, фахрий ёрлиқ ва қимматбаҳо эсдалик совғалари билан тақдирланди.
Тадбир сўнгида ҳарбий оркестр жамоаси ва самарқандлик хонандаларнинг концерт дастури намойиш этилди.

Ўз мухбиримиз