Ўзбекистон фахрийларининг ижтимоий фаолиятини қўллаб-қувватлаш "Нуроний" жамғармаси туман бўлимининг мажлислар залида Халқаро болаларни ҳимоя қилиш куни муносабати билан байрам тадбири бўлиб ўтди. Туман ҳокимлиги, "Адолат" социал-демократик партияси вилоят Кенгаши ва туман бўлимлари ташаббуси билан ўтказилган ушбу тадбирга тумандаги касб-ҳунар коллежлари ва умумий ўрта таълим мактабларида таҳсил олаётган ногиронлиги бўлган бир неча ўғил-қизлар таклиф қилиниб, уларга байрам совғалари улашилди.

Тадбирни туман ҳокимининг ёшлар сиёсати, ижтимоий ривожлантириш, ва маънавий-маърифий ишлар бўйича ўринбосари Р. Ражабов қисқача кириш сўзи билан очди ва иштирокчиларни Халқаро болаларни ҳимоя қилиш куни билан қутлади. Шундан сўнг "Адолат" социал-демократик партияси вилоят Кенгаши раиси ўринбосари А. Бўрибоев, нуроний отахон Б. Зиёев, СамДУ профессори А. Қамарзодалар сўзга чиқиб, мамлакатимизда болаларнинг ҳар жиҳатдан баркамол ўсишлари, касб-ҳунар ўрганишлари учун яратилган шарт-шароитлар ҳақида тўлқинланиб гапиришди ва йиғилганларни байрам билан табриклашди. Пировардида ногиронлиги бўлган ўнлаб болаларга байрам муносабати билан эсдалик совғалари топширилди. Шу куни "Адолат" социал-демократик партияси вилоят Кенгаши аъзолари байрам тантаналарига қатнаша олмайдиган ногиронлиги бўлган болаларнинг уйларига ташриф буюриб, уларга байрам совғалари улашдилар.

Х. НАЗАРҚОСИМОВ