Хабарингиз бор, "Гулобод тонги" газетасининг жорий йил 16 август 31 - сонида эълон қилинган "Учар товуқлар" ёхуд мактабгача таълим муассасаларида аҳвол қандай?" сарлавҳали мақолада тумандаги айрим МТМларнинг аҳволини ўрганиш жараёнида йўл қўйилаётган хато - камчиликлар, айниқса, болажонлар овқатининг сифати борасидаги жиддий нуқсонлар қаттиқ танқид остига олинганди. Мақолада келтирилган нохуш ҳолатлар юзасидан туман мактабгача таълим бўлими расмий муносабат билдириб, жавоб мактубида қуйидагиларни маълум қилган:

"Самарқанд тумани ҳокимлиги ишчи гуруҳи томонидан тумандаги 4 та мактабгача таълим муассасасига 9 август куни ўрганиш ўтказилган. Ўрганиш натижалари бўйича 2019 йил 16 август куни туман "Гулобод тонги" газетасининг 31 - сонида "Учар товуқлар ёхуд мактабгача таълим муассасаларида аҳвол қандай?" мақоласида кўрсатилган камчиликларни бартараф этиш юзасидан бўлимнинг масъул ходимлари томонидан 4 та (1,9,13,25) мактабгача таълим муассасаси фаолияти жойида ўрганилди ва аниқланган камчиликларни бартараф этиш ва келгусида шу каби хато ва камчиликларни олдини олиш мақсадида ҳар бир мактабгача таълим муассасаси бўйича алоҳида чора - тадбирлар белгиланди.
Ўрганиш натижалари юзасидан тумандаги 1- МТМ ҳамшираси Жалолова Шоҳида, 25 - МТМ хўжалик мудири Мардонова Санобарлар ўз вазифаларига совуққонлик билан ёндошганлик учун эгаллаб турган лавозимларидан озод этилди. 1, 9, 13, 25 - МТМ мудираларига тегишли интизомий чора кўриш учун вилоят мактабгача таълим бошқармасига таклиф берилди.
Ваҳолонки, шу каби хато камчиликлар олдини олиш ҳамда 5 август куни вилоят ҳокимлигининг аппарат йиғилишида вилоятдаги мактабгача таълим муассасалари фаолиятида юзага келаётган муаммолар ва уларни бартараф этиш чора - тадбирлари юзасидан берилган топшириқлар ижросини таъминлаш мақсадида бўлимнинг 2019 йил 5 августдаги 01/01-08-298 - сонли чора - тадбирлар режаси тасдиқланиб, тумандаги барча мактабгача таълим муассасаларида етказилиб ва жойларга чиққан ҳолда амалий ва методик ёрдам кўрсатиб келинмоқда.

С.ХАҚБЕРДИЕВ, бўлим мудири в.б