Арабхона маҳалла фуқаролар йиғинида туман ҳокими, биринчи сектор раҳбари Шуҳрат Жамоловнинг сайёр қабули ўтказилди.

Арабхона маҳалласида 3420 нафардан зиёд аҳоли 350 та хонадонда истиқомат қилади. Маиший хизмат касб-ҳунар коллежи, 3-умумтаълим мактаби, 2 та спорт майдончалари, 1 та шифохона, 1 та оилавий поликлиника, 11 та савдо шохобчаси, 1 та тўйхона, 1 та гўзаллик салони, 1 та устахона, 1 та дорихона, 12 та ички кўчалар маҳалла аҳлининг хизматида. 15 йилдан буён маҳалла фаолиятини бошқараётган раис Абдурасул Отамуродов ҳар бир хонадон муҳити, фуқароларнинг касб-кори, яшаш тарзи, орзу-умидлари ва муаммоларидан хабардор бўлиб, имконият ҳамда ваколати доирасида амалий ёрдам кўрсатмоқда. У ёки бу соҳа мутахассислари, ижро идоралари билан бамаслаҳат иш олиб бормоқда.
Туман раҳбари қабулга келган мурожаатчиларни, маҳалла фаолларини бирдамлик, фаолликка чақириб, қабристон, ариқ-зовурлар, ички кўчалар, ҳовли ва томорқаларни тартибга келтириш, обод этишга ундади. Айниқса, Наврўз умумхалқ байрами олдидан бундай саъй-ҳаракатларни жадал олиб боришга фуқароларни чорлади.
Сайёр қабулда 19 нафар фуқаронинг уй-жойга эҳтиёжмандлик, табиий газ, йўл қурилиши, тиббиёт ҳамда таълим-тарбия соҳаларига оид мурожаатлари эшитилди. Мурожаатларнинг 10 таси шу ернинг ўзида ижобий ечим топди, 3 таси бўйича тушунтириш-тарғибот ишлари олиб борилди. Қолган муаммоларни ҳал этиш бўйича масъул раҳбар ходимларга тегишли топшириқлар берилди.