Пешонаси ялпоқгинам,

Митти кўзи мунчоқгинам,

Хуш суратли, думбоқгинам,

Ихтиёрим – болажоним.

Ётлар бордир демагин сен,

Ҳеч дарду ғам емагин сен,

Овунчоғим, эрмагим сен,

Ихтиёрим – болажоним.

Кўзларингда кўзим бордир,

Сўзларингда сўзим бордир,

Нур чеҳрангда юзим бордир,

Ихтиёрим – болажоним.

Хизмат бурчинг адо этгин,

Ёвнинг ўқин хато этгин,

Оилангга бахт ато этгин

Ихтиёрим – болажоним.

Тўйлар қилгин – даврон сурай,

Фарзандларинг бахтин кўрай,

Бошга саллабандон ўрай,

Ихтиёрим – болажоним.

Пешонаси ялпоқгинам,

Митти кўзи мунчоқгинам,

Хуш суратли, думбоқгинам,

Ихтиёрим – болажоним.

Матлуба ҒАФУРОВА