Гулобод тонги Халқ депутатлари Самарқанд туман Кенгаши ва туман ҳокимлиги газетаси
Гулобод тонги Халқ депутатлари Самарқанд туман Кенгаши ва туман ҳокимлиги газетаси
www.gulobodtongi.uz

 
 

ҲАВАС УЙҒОТГАН УЧРАШУВ

Ҳеч бир нарса мамлакатни спорт каби тезда дунёга машҳур қила олмайди.
Ислом Каримов

Рио-де-Жанейрода XV ёзги Паралимпия ўйинларининг таассуротлари ҳали-ҳамон кўпчиликнинг ёдида бўлса, ажабмас. Ўзбекистондан қатнашган 32 нафар спортчи Бразилиядан 31 медаль билан қайтишди. Агар жамоамизнинг 2012 йилда фақат бир медалга сазовор бўлганини эсласак, бу галги ютуқ қанчалар оламшумул бўлгани ўз-ўзидан маълум бўлади. Океанортида спортчиларимиз кўрсатган натижалар 6 та жаҳон, 7 та паралимпиада ва 12 та Осиё рекордини янгилади. Буни ўзбек спортида ҳақиқий тарихий воқеа бўлди, дейиш мумкин.
XXXI ёзги Олимпия ўйинларида Ўзбекистон делегацияси бокс турида барча рақибларини ортда қолдириб биринчи ўринни эгаллаган бўлса, паралимпиячилар орасида Ўзбекистон делегацияси спортнинг дзюдо тури бўйича умумжамоа ҳисобида биринчи ўриндан жой олди. Бунда самарқандлик дзюдочи Ўткиржон Нигматовнинг хам муносиб улуши бор.
Ўтган ҳафта дзюдо бўйича 66 кг гача вазн тоифасида XV ёзги Паралимпия ўйинлари ғолиби Ўткиржон Нигматов Са- марқанд имкониятлари чекланган шахслар учун ихтисослаштирилган махсус касб-ҳунар коллежи ўқувчилари билан учрашиб, уларни қизиқтирган саволларига жавоб берди.
– Спортчилар сонига нисбатан медаллар жам-ғариш борасида Ўзбекистон делегацияси қарийб 97 фоиз натижа кўрсатиб, XV Паралимпия ўйинларида энг яхши кўрсаткичга эга бўлди,–деди чемпион ҳамюртларимизнинг олимпиададаги иштироки ҳақида гапириб, – Шуни алоҳида эътироф этиш керакки, юртимиз паралимпиячилари Марказий Осиё давлатлари орасида биринчи, МДҲда Украинадан сўнг иккинчи, Осиёда Хитой ва Эрондан сўнг учинчи ўринни эгаллашди. Шу вақтга қадар бирорта давлат вакиллари, яъни иштирокчилар сони ва қўлга киритилган медаллар натижаси бўйича бундай кўрсаткичга эришмаган. Бразилияда жуда кўп давлат делегациялари бизнинг эришган ютуқларга ҳайрат ва ҳавас билан қараганининг гувоҳи бўлдим. Бу ютуқларни қўлга киритишда халқимизнинг қўллаб-қувватлаши ва дуоси, давлатимиз томонидан ёшларга яратилаётган шарт-шароитлар, уларга бўлган ишонч ҳамда спортчиларимиз ва уларни тарбиялаган мураббийларининг тинимсиз меҳнати бор.
Ўқувчиларнинг “Сиздек чемпион бўлиш учун нима қилиш керак?” деган саволига паралимпия ғолиби кўйидагича жавоб қайтарди: “Инсон аниқ мақсадни олдига қўйиб, унга эришиш учун астойдил ҳаракат қилса, ўз муддаосига етади. Ва яна ирода ва ишонч инсон истагини рўёбга чиқарадиган асосий омил ҳисобланади. Сизларда спорт билан шуғулланиш учун ҳамма шароит бор экан. Ҳар куни иштиёқ билан ўзи қизиққан спорт турида тегишли машқларни мунтазам бажариб борган ўқувчи, албатта, фақат жисмоний чиниқишга эга бўлибгина қолмай, маълум ижобий натижаларга ҳам эришиши муқаррар”.

Баҳодир Ҳакимов,
Самарқанд имкониятлари чекланган шахслар учун ихтисослаштирилган махсус касб-ҳунар коллежи ўқитувчиси


Дата добавления: 07/04/2017 15:12;   Просмотров: 1545
 
Для чтения текста нажмите эту кнопку