Вилоят Матбуот марказида "Овози Самарқанд" газетаси кутубхонаси рукни остида чоп этилган "Саодати дўстӣ" ("Дўстлик саодати") китобининг тақдимоти ҳамда таҳририят томонидан эълон қилинган "Сайқали замин" кўрик -танлови ғолибларини тақдирлашга бағишланган тадбир бўлиб ўтди.

Вилоят матбуот ва ахборот бошқармаси, Ўзбекистон Ёзувчилар уюшмаси ва Ўзбекистон Журналистлари ижодий уюшмаси вилоят бўлимлари, "Овози Самарқанд" газетаси ҳамкорлигида ўтказилган тадбирда матбуот фахрийлари, ёзувчи ва шоирлар, оммавий ахборот воситалари вакиллари иштирок этди.
Ижодий анжуманда Ўзбекистон Ёзувчилар уюшмаси вилоят бўлими раиси Т.Тугалов, Ўзбекистон Журналистлари ижодий уюшмаси вилоят бўлими раиси Ф.Тошев, вилоят матбуот ва ахборот бошқармаси бошлиғи М.Ибодуллоев, "Овози Самарқанд" газетаси бош муҳаррири Б.Раҳмоновлар бугунги кунда ўзбек ва дунё адабиётининг энг яхши намуналарини бошқа тилларга таржима қилиш ва шу асосда адабиётлараро ҳамкорликни мустаҳкамлашга қаратилган "Саодати дўстӣ" ("Дўстлик саодати") китоби хусусида сўз юритдилар.
- Икки халқнинг дўстлигини янада мустаҳкамлаш, тожик адабиёти ихлосмандларини ўзбек шеърияти билан ошно этиш мақсадида чоп этилган бу китобда менинг ҳам шеърларим тожик тилига моҳирона таржима қилинган, - дейди Ўзбекистонда хизмат кўрсатган маданият ходими Хосият Бобомуродова. - Шунингдек, китобда 60 нафар ўзбек ижодкорларининг шеърлари ҳам таржима қилиниб, нашр этилган.
"Сайқали замин" танловига 50 дан ортиқ ижодий асарлар келиб тушган. Улар орасидан "Энг яхши шеър" йўналишида Дилшода Ҳазратқулова, "Энг яхши ҳикоя" йўналишида Фаридун Фарҳодзод биринчи ўринга лойиқ кўрилди ва мукофотлар топширилди.
Худди шундай, газета таҳририятига қўшган ҳиссаси ва ҳамкорлиги учун ўнга яқин ижодкор фахрийларга ташаккурнома ва китоблар берилди.
Айтиш жоизки, "Овози Самарқанд" газетаси келажакда газета қошида "Таржимонлик мактаби" фаолиятини йўлга қўйишни ҳамда Самарқандда тожик тилида ижод қилаётган қаламкашларнинг асарлари намуналаридан таркиб топган мажмуани чоп этишни режалаштирган.

Д.НАСИМОВА