Туман ҳокимлиги, Давлат хавфсизлик хизмати, туман ички ишлар бўлими ва туман имом-хатиблиги ҳамкорлигида туман маиший хизмат касб-ҳунар коллежида "Диний экстремизм ва терроризмга қаршимиз!" шиори остида маънавий-маърифий тадбир бўлиб ўтди. Унда касб-ҳунар коллежининг битирувчилари, мазкур ҳудуддаги умумий ўрта таълим мактабларининг маънавият ва маърифат ишлари бўйича директор ўринбосарлари қатнашдилар.

Кун тартибидаги масалани маиший хизмат касб-ҳунар коллежининг директори Зулхумор Адилова қисқача кириш сўзи билан очди. Шундан сўнг "Домла Яхши" масжиди имом-хатиби Усмон Нормуродов Муҳаммад пайғамбаримиз (с.а.в.) таъкидлашларича, дунёда иккита буюк неъмат мавжуд бўлса, уларнинг бири тансиҳатлик ва иккинчиси тинчлик - хотиржамлик эканлигини ҳамда бу иккала буюк неъмат ҳам бизнинг она - Ватанимизда мавжудлиги, террористлар одамларни бир - бирига қайраши, ёстиғини қуритиши тўғрисида тўхталиб ўтди.
Туман ички ишлар бўлими 22-бўлинма бошлиғи Азамат Бобоёров ушбу ҳудудда 2018 йилда 12 та маҳаллада содир этилган 32 та жиноят ва ўқув масканлари, шу жумладан маиший хизмат касб-ҳунар коллежида олиб борилаётган профилактика ишлари тўғрисида тўхталди.
Маънавий-маърифий тадбирда Давлат хавфсизлик хизмати ходими ер юзида 500 дан ортиқ террористик ташкилотлар мавжудлиги, улар асосан интернетнинг "Одноклассник", Фейсбук" сайтларидан фойдаланишлари, ўтган йили 10 дан ортиқ туман фуқаролари "Одноклассник" орқали жиноят йўлига кириб, қамалиб кетганликлари, сепаратизм билан шуғулланувчилар ва уларнинг айримлари Афғонистон, Ироқ, Сурия мамлакатларида хор-зорликда яшаётганликлари ҳақида маълумот берди.
Тадбирнинг охирида туман ҳокимининг ўринбосари Азамат Ҳалимов сўзга чиқиб, ҳижрат, жиҳод, терроризмнинг зиёнини одамлар била туриб ушбу қинғир йўлларга киришининг сабаблари тўғрисидаги саволларга жавоб берди. Маънавий-маърифий тадбир йиғилганларга яхши таассурот қолдирди.

Р.НАИМОВ
Суратда: тадбирдан лавҳа акс этган.
Сурат муаллифи Б.ҚОДИРОВ