Қуролли Кучлар ташкил этилганлигининг 26 йиллиги ва 14 январь - Ватан ҳимоячилари куни муносабати билан Самарқанд горнизони офицерлар уйида Самарқанд сержантлар тайёрлаш мактаби курсантлари ҳамда офицер ва ҳарбий хизматчилари иштирокида байрам тадбири бўлиб ўтди.

Тадбирни мактаб бошланғичи ҳарбий ватанпарварлик, маънавий-ахлоқий тарбия ва ёшлар билан ишлаш бўйича ўринбосари полковник, Ш.Юсупов очди ва барчани байрам билан қутлади. Таъкидландики, ҳарбийлик шарафли ва муқаддас касбдир. Она ватанимиз сарҳадларини ҳимоя қилишда, юртимиз тинчлигию, халқимиз осойишталигини таъминлашда ҳарбийларимиз хизмати беқиёсдир. Шунинг учун ана шундай маъсулиятли бурчларини сидқидилдан адо этаётган ватан ўғлонларини қанчалик қадрласак ва эъзозласак арзийди.
Шундан сўнг бир гуруҳ ҳарбий ва жанговор тайёргарликларни аъло даражада ўтаётган офицер, курсант, аскарлар мактаб бошлиғининг фахрий ёрлиқлари билан тақдирланди. Эътиборли жиҳати шундаки, шу куни туман ҳокимлиги вакиллари ҳам ушбу тадбирда иштирок этиб, ҳарбийларимизга туман ҳокимининг ташаккурномалари ва эсдалик совғаларини топширдилар.
Туман маданият бўлими санъаткорлари томонидан юртимиз мадҳи, истиқлолни шарафлаб ижро этилган қуй-қўшиқлар ҳарбийларга хуш кайфият улашди.

Т.ЮСУПОВ, Б.ҚОДИРОВ
Суратда: тадбирдан лавҳа