Гулобод тонги Халқ депутатлари Самарқанд туман Кенгаши ва туман ҳокимлиги газетаси
Гулобод тонги Халқ депутатлари Самарқанд туман Кенгаши ва туман ҳокимлиги газетаси
www.gulobodtongi.uz

 
 

Ютуқли чек ўйинлари – энди бутун Ўзбекистон бўйлаб

Давлат солиқ қўмитаси ютуқли чек ўйинлари 2020 йил 29 октябрдан бошлаб республикамизнинг барча ҳудудларини қамраб олади.


Бу Президентимизнинг “Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида”ги Фармонида белгиланди.
Ҳужжатга мувофиқ, Давлат солиқ қўмитаси томонидан 2020 йилда Тошкент шаҳрида синов тариқасида жорий этилган ютуқли чек ўйинларининг муваффақияти сабаб, ушбу акция кўлами янада кенгаяди.
Яъни, энди истеъмолчилар ютуқли чек ўйинларининг навбатдаги – V тиражида иштирок этиш учун республиканинг исталган ҳудудида онлайн НКМ ёки виртуал касса чекини олиб рўйхатдан ўтказиши мумкин.
Асосий шарт – ҳар бир истеъмолчи битта савдо шохобчасидан бир кунда фақат иккита, харид миқдори 1000 (минг) сўмдан кам бўлмаган чекни рўйхатдан ўтказиши мумкин.
Эслатиб ўтамиз, ютуқли чек ўйинларида иштирок этиш учун харид қилинган маҳсулот (хизмат) учун онлайн НКМ ёки виртуал кассанинг QR кодли чекини олиш лозим.
Бундай қурилмалар барча дорихоналар, автомобилларга ёқилғи қуйиш шохобчалари, алкоголь ва тамаки маҳсулотлари савдоси билан шуғулланувчи дўконлар, шунингдек, йирик савдо тармоқларида ўрнатилган. Ҳозирда республикада қарийб 64 минг савдо шохобчасида бундай қурилмалар мавжуд.
Кейинги қадам – чекнинг QR кодини SOLIQ мобил иловасида сканерлаш ёки 12 хонали фискал белгисини 1077 рақамига SMS тарзда юбориш лозим. Рўйхатдан ўтказиш муваффақиятли якунлангандан сўнг, Сиз ютуқли ўйин иштирокчисига айланасиз.
Тошкент шаҳрида ўтказилган ютуқли чек ўйинларининг ҳар бир тиражида иштирокчилар сони тобора ортиб борди. Ҳозиргача ўтказилган 4 та тиражда онлайн НКМ ва виртуал кассалардан берилган қарийб 110 минг дона чек иштирок этди. Ушбу чекларнинг умумий харид миқдори 52 млрд. сўмдан зиёдни ташкил этади.
Айни вақтга қадар V тиражда иштирок этиш учун 30 мингдан ортиқ чек рўйхатдан ўтказилди. Эслатиб ўтамиз, ушбу тиражда 2020 йил 13 октябрь (соат 12:00)дан бошлаб рўйхатдан ўтказилган чеклар иштирок этади. Ўйин ўтказилиш санаси қўшимча равишда ДСҚ расмий манбалари орқали маълум қилинади.
Ютуқли чек ўйинларида иштирок этиш шартлари билан қуйидаги ҳавола орқали танишишингиз мумкин.
Чекларни талаб қилинг, рўйхатдан ўтказинг ва қимматбаҳо совғалар ёки супер ютуқ – Chevrolet Nexia 3 соҳиби бўлинг!


ДСҚ матбуот хизмати.


Дата добавления: 31/10/2020 16:07;   Просмотров: 739
 
Для чтения текста нажмите эту кнопку