Жорий йилнинг апрель ойидан бошлаб, юртимизнинг ҳар бир гўшасида мини-футбол бўйича ДХХ кубоги мусобақаси ўтказилади.

Вилоятимизда ҳам ДХХ кубоги мусобақасининг шаҳар ва туманлар босқичлари шу йил 5 апрелдан 15 апрелга қадар бўлиб ўтади.

Дастлаб, шаҳар ва туманларнинг 4 та сектор ҳудудлари кесимида ҳар бир маҳалла ёшларидан ташкил топган жамоалар ғолиблик учун курашиб, сўнг ҳудудлараро баҳсларда куч синашади. Мусобақа туман, вилоят ва республика босқичларига қадар давом этади.

- Мусобақани ўтказишдан мақсад уюшмаган, кам таъминланган, меҳрибонлик уйлари тарбияланувчилари ва хорижий мамлакатларда ишлаб келиб, ҳозирги кунда ишсиз бўлган ёшлар ҳамда имконияти чекланган фуқаролар ўртасида жисмоний тарбия ва спортни, шунингдек соғлом турмуш тарзини тарғиб қилишдан иборатдир, - дейди Оҳалик маҳалласида ўтказилган мусобақанинг очилиш маросимида иштирок этган туман ҳокимининг ёш­лар сиёсати, ижтимоий ривожлантириш ва маънавий-маърифий ишлар бўйича ўринбосари Дилфуза Азизова.

Мусобақаларнинг биринчи босқичи жорий йилнинг апрель-май, иккинчи босқичи июнь-июль ойларида ҳамда учинчи финал босиқичи август ойида ўтказилиши режалаштирилган.

Тошпўлод ЮСУПОВ.